ذكريات اسكندرانية

كنت بدور على بعض الأوراق الخاصة بيا شخصيا فى وقت كدا معين وفأثناء مابدور وقعت فى إيدى

صور متصورها أنا وأصحابى فى اسكندرية قبل التزامى

واسكندرية ليها عندى معزة خاصة جدا جوة قلبى لعدة أسباب وهى أول مرة نزولى اسكندرية أنا وأصحابى فى عام 1997

وبمجرد ماشوفت البحر أخدتنى رهبة وفرحة فى نفس الوقت ومكنتش مصدق إنى فى اسكندرية بسبب كتر

الكلام والحواديت وكتابة الشعر وغناء المغنيين عن اسكندرية لكن بصراحة اللى شاف غير اللى سمع والنظرة

الأولى للبحر كانت عبارة عن كلمة خرجت من بقى وقولتله يااااااااااااااه هى دى اسكندرية اللى بيتحكى عنها المهم

عشت اجمل ايام من ايام العمر فى اسكندرية وأصبحت إسكندرية هى جدول اجبارى لينا كشلة لابد من زيارتها كل

صيف حتى لو الواحد هيبيع كليته والا كبدته وفى بعض السنين من السنوات اللى زرنا فيها أنا وصحابى محمد وخالد

وسيد وحسام ووائل وأحمد ومحمود وهشام والعبد لله وليد نزلنا اسكندرية وعلى خالد ابن الوليد المدينة المفضلة لينا

وكانت الشقق مولعة قوى فى الموسم ده يعنى أقل شقة متوسط إيجارها فى اليوم كان حوالى 65 جنيه وكنا بندور

على سمسار عشان نأجر منه شقة ولقينا كدة راجل سمسار شكله مقبول عرفنا انه صعيدى ودخلنا عليه وقولتله السلام

عليكم ياحاج قالنا وعليكم السلام قلتله عاوزين شقة كدة بالصلاة على النبى نقعد فيها أسبوع والا عشر أيام قال ماشى

موجودة قاله صاحبى سيد رمضان بكام قالنا شقى قدام البحر ب35 جنيه فى اليوم لقيت كل العيال فاتحين بقهم مش

مصدقين وهشام لسة هيقوله ماشى قمت ضاربه فى رجله عشان يسكت ورديت عليه قولتله ليه ياعم بحبحها شوية

قالنا تعالوا شوفوها وبعد كدة احكموا عليها قلنا ماشى وطلعنا عشان نشوفها وليقنا الشقة أكتر من رائعة وهايلة

الشقة فعلا على البحر وواسعة جدا وفيها 8 سراير وسخان وغيره وغيره ومجاش فى بالى الا انى أقول الراجل ده يا

إما عبيط يا إما نصاب وطبعا قولت أكيد عبيط عشان لو نصاب هيكون معاه ازاى مفتاح الشقة المهم وافقنا طبعا على

الشقة وقبضناه الفلوس وكتبنا عقد كمان زيادة حرص وغيرنا الكالون برضه زيادة حرصين ولما نزل قلنا الراجل ده

عبيط وكنا فرحانين قوى المهم عدى أول يوم واحنا بنطبخ الأكل وهاتك ياهزار ويا قفش وياضحك وكنا بنيجى أخر

النهار نلبس وننزل نتمشى على كورنيش اسكندرية الساحرواخر الليل نقعد نتعشى ونضحك ونهزر وكدةولما جه الليل

كل واحد دخل نام واحنا نايمين سمعنا صوت عاصفة شديدة والشبابيك عمالة تخبط فى بعض ولما

صحينا كل واحد افتكر انه التانى هو اللى كان بيعمل كدة والكل بينفى0

المهم محطناش فى بالنا وبعتنا وائل ينزل يجيب برطمان عصير بودرة تانج برتقال كبيرولما جابه يدوب عملنا منه

مرة واحدة وشيلناه فى التلاجة وكوينا هدومنا ولبسنا منها شوية للخروج ولما رجعنا البيت كانت المفاجأة برطمان

التانج مش موجود وقلبنا عليه الشقة مش لقينه والهدوم المكوية مرمية فى الحمام والفلوس اللى شايلينها متاخد منها

الفكة بس اللى كانت ملفوفة جوة الفلوس الكبيرة يعنى الفلوس الفكة اختفت والكبيرة موجودة ومجاش فى بالنا الا

حاجة واحدة بس إن الشقة مسكونة وانقسمت الشلة لفريقين فريق خايف وبيطالب نسيب الشقة والفريق التانى ميت

من الضحك وانا منهم وبطالب نلعب مع العفاريت ولما جه الليل قلنا منمش لما نشوف العواصف دى هتيجى والا لاء

ولما طفينا كل الأنوار لقينا أصوات غريبة والشبابيك بترزع وهوا شدييييد وهاتك ياصريخ من سيد رمضان وهاتك

ياضحك مننا انا وهشام ومحمد ونورنا النور بسرعة ولقينا سيد رمضان قال والله ما انا قاعد دقيقة فى الشقة دى واحنا

ميتين من الضحك وساعتها بس عرفنا ليه الراجل ادانا الشقة رخيصة كدة وطلعنا احنا اللى عبطة وفسخنا طبعا معاه

العقد بناء على طلب المرعوبين وكل لما أشوف الصور والشقة افتكرأجمل أيام من العمر وأجمل أصحاب

0فى الدنيا ربنا يسعدهم جميعا