Wednesday, October 24, 2007

أنا وأعضاء زعتر

ياااااااااااه حارة زعتر حقيقى وحشتنى بقالى كتير معرفش حاجة عنها!! المهم نخش فى الأحداث الموبايل بيرن مين ده ؟ ده أبو المجانين زى مابقوله أو جانو رديت عليه وطبعا عتاب رخم زيه وقاللى إن أعضاء حارة زعتر هيتجمعوا ولازم تكون موجود سكت كدة قالى يالا احنا هنبقى صايمين وهنروح مع بعض نفطر كلنا وطبعا سألته مين اللى جاى قالى العضو من أول لمسة وابن أدم ويوسف بن تشفين وملم التصميم وسيف الإسلام وناس تانية تقريبا جاية قلتله هحاول أجى قاللى لاء هتيجى قلتله خلاص انا جاى باذن الله ورغم كثرة المشاغل إلا إنى جهزت نفسى عشان أروح أغير جو شوية وروحت اقابل جانو فى التحرير ولقيت اللى بيفتحلى الباب فى النزول جانو المجنون وطبعا مخلصتش من لسانه عمال يقول انت بتستهبل كل ده الوقت زنق ومسكتوش الا الأحضان وروحنا على مدينة نصر لملاقاة الأعضاء وملقيناش حد طبعا قولت لجانو الظاهر انت هتبقى كوباية البلح بتاعتى اللى هافطر عليها قالى لا ياعم جايين وطبعا وشوه اصفر من الخوف منى هههههههه لحد لما اتصل بيهم وجم من أول لمسة اللى هو وائل وسيف الإسلام محمد وكان فيه قبل كدة اتصال بينى وبين سيف الاسلام فى مطعم بيتزا انا وجانو عن طريق تليفون جانو وكان كلامه اعتذار منه على مشاركة كدة ايام المنتدى ولما اتقابلنا لقيته بيكرر اعتذاره وقلتله على فكرة انا مش فاكر كانت فى موضوع ايه وذكرنى وطبعا مكانش فى بالى حاجة والله وقابلت وائل او البشمهندس وائل وقلت فين الباقى قالوا فى الطريق وطبعا من اول لمسة مش هيصبر المغرب أذن ولازم نفطر وطبعا كان لازم ندور على مسجد ومش لقينا ودخلنا مطعم فرحات بمدينة نصر مطعم كباب وكفتة والذى منه وأول مادخلنا صلينا جوة المطعم جماعة فى دور العائلات وللأسف ووقفت إمام بيهم بعد إصرار وائل وسيف بعدم الوقوف ونفس الشئ جانو وصلينا والحمدلله وصمم وائل يأكلنا هو على مزاجه وكانت أكلة عجب والواد جانو كسفنا أكله كان قليل وسيف الاسلام كانت عجباه الشوربة وانا وائل كان عاجبنا الحمام لحد ما خلصنا وروحنا قعدنا فى كافيه محترم وقلتلهم نفسى أشرب شاى وفعلا قعدنا وبدأو بقى فتح ملفات المنتدى وأنا بعيد ليه عنه وفوجئ وائل إنى موقوف لإن زينهم الحلاق مش كاتب تحت إسمى موقوف على عكس باقى الأعضاء الموقوفين عشان يتجنب إعتراض بعض الأعضاء على توقيفى زى قبل كدة وكانت القاعدة جميلة وسيف الإسلام كان طالب يستفسر منى عن حاجات كتيرة للإيضاح وأعتقد والحمدلله ظهرتله والجدير بقى بالذكر إن الواد جانو صور كل حاجة حتى الحوارات اللى بينا وفتحنا اللاب توب بتاع وائل واشترينا اسطوانات لنسخ بعض الحاجات المهمة والجميلة لكن اللى زعلنى من الخروجة دى هو تحمل من اول لمسة كل نفقات الخروجة رغم قبل وصولنا قولت لجانو أى شئ ينزل إحنا اللى نحاسب عليه وشددنا على بعض بكدة لكن من أول لمسة ربنا يجزيه كل خير قام حلف علينا وأهم مافى الحوار وعلى عكس ماتوقعته هو الا‘عتراض الكامل من معظم الأعضاء على سياسة المنتدى زى ماقالولى وطبعا فى السر وطلبوا منى معرفة سر معاداة زينهم وفهمتهم إن مفيش أى عداء شخصى بينى وبينه لكن هو اختلاف جوهرى فى الأراء وإن زينهم لما كان بينزل إمبابة كان بيسأل عليا وكانت شخصية هادية برة المنتدى حتى إنى قولتله إنت برة غير جوة وفهمتهم إن أنا العضو الوحيد كنت صاحب مبادرة لقاء أعضاء حارة زعتر الضخم وكان شبه جميع الشباب هيتجمعوا ورغم إنى كنت موقوف فى الوقت ده إلا إنى كنت ناوى أجيب زينهم فى التجمع رغم تحذيرى من الأعضاء خشية الرفض إلا إنى اتصلت وسبحان الله تليفونه مقفول على طول وأكتر شئ أحزننى هو إنهم قاولى إن المنتدى شبه مات من عقول كبيرة وناس كتيرة بتمشى وناس جديدة بتيجى وده شئ ضايقنى لإن المنتدى كنت بحبه جدا وشوفت فيه أيام جميلة ومتباينة والجدير إنهم شددوا على التجمع مرة تانية بشكل أكبر وربنا يستر بقى المرة الجاية عشان فى أعضاء كتيرة مختلفين جايين واتصل ملك التصميم وكلمته وكلمنى وكان نفسى اشوفه لانه راجل محترم جدا وكان اسف لعدم وجوده بسبب ظروف كدة ونفس الحال ابن ادم اللى قال جاى ومجاشوطلب منى سبف الاسلام ووائل انى ادور على شقة للروان فى القاهرة وانا وعدتهم انى ادورلهم جمب الدائرى وانتهت الخروجة بعناق حار من الجميع على وعد اللقاء قريبا وروحنا انا وجانو وخضنا فى تفاصيل كتيرة تانية بعيدة عن المنتدى وحقيقى خروجة كانت رائعة وحقيقى وحشنى المنتدى لكنى مش متابع وزعلت جدا من الاخبار اللى قالوهالى لكن ادى حال الدنيا

Monday, October 22, 2007

تاج من الأخت أمنية وربنا يسهل!!


لو قالولك اختار عصر من عصور مصر علشان تعيش فيه تختار أى ‏عصر و فى عهد أى حاكم .. واشمعنى؟
كنت هاختار عصر أنور السادات لان بيتهيألى كدة الدنيا كانت بخير رغم الأحداث السياسية المختلفة وكنت أحب أعيش جو نصر أكتوبر
لإن الناس كانت كلها بتحب بعض على عكس أيامنا
أول ‏أولويه فى حياتك عيلتك ولا شغلك ولا أصحابك؟
طبعا عيلتى ثم أصحابى ثم شغلى
إيه أكتر ‏حاجه بتحبها في رمضان؟
كل حاجة حلوة فى رمضان من صيام نهاره لقيام ليله لخيره الكتير لروحانيته وهكذا
اوصف ليا ‏أجمل فطار ممكن تفطره
أجمل إفطار ممكن أفطره وأنا فى دار للأيتام مع الأطفال
لو أنت ‏حاكم على مجموعه من الأفراد هتكون عادل؟؟ طب هتعمل إيه عشان تتأكد إنك حاكم ‏عادل؟
أكيد هحاول أكون عادل وعشان أتأكد إنى هاكم بالعدل هاحكم بكتاب الله وسنته
اللى بيبوظ الحكام .. نفسهم؟ ولا الشعب؟ ‏ولا الحاشيه المقربه؟
اللى بيبوظ الحكام بعدهم عن كتاب الله وسنة رسوله صلى الله عليه وسلم
مين ‏أكتر إعلامي مصري بتحترمه؟
كنت باحترم حمدى قنديل فى البداية لكن لما عرفت انه زوج نجلاء فتحى عرفت انه معندوش ريحة الرجولة ده غير انه بيمثل دور الوطنى أما الأن فبحترم الاعلامى دكتور فيصل قاسم صاحب برنامج الاتجاه المعاكس على قناة الجزيرة
قريت ديوان عمر مصطفى صاحب بلوج تجربه " أسباب وجيهه للفرح" ‏عن دار ملامح و لا لسه ؟؟
بصراحة معرفوش ومسمعتش عنه قبل كدة
لو ‏ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ‏ايه؟
كنت أتمنى أشتغل ظابط مخابرات لإنى كنت مغرم جدا بالجاسوسية وخصوصا إن أخويا بيتشغل كمان فى جهاز المخابرات المصرية ولإنى تأثرت جدا بكل جاسوس مصرى الحقيقى بداية من رفعت الجمال ( رأفت الهجان ) ونهاية بأحمد الهوان ( جمعة الشوان)ا.
ايه تانى بلد تتمنى تعيش فيها بعد ‏مصر؟
البلد الحرام
اوصف ليا ‏ترتيبات أجمل فرح ممكن تحضره
أجمل فرح ممكن أحضره وهو فى بالى هو إنى أعزم أكبر قدر من الفقراء والمساكين والأيتام وأقوم بإطعامهم وإفراحهم وكمان دعوة كبار علماء مصر زى الشيخ أبو إسحاق الحوينى وفضيلة الشيخ محمد حسان والشيخ الدكتور محمود عبدالرازق الرضوانى وفضيلة الشيخ نصر فريد واصل وكلهم علاقتى بهم جيدة جدا والحمدلله
بتراعي ‏كلام الناس والقيل والقال؟ لو اه او لو لا قول لى ‏ليه؟
على حسب الشخص القائل إن كان محترم وليه ثقله طبعا باحترمه واعمله حساب أما إن كان جعجاع زى الطبلة صوتها عالى ومن جوة فاضية بسيبه يرن ولا على بالى إلا إذا تخطه حدوده فيجب ردعه
صحيت من النوم ما لقيتش الموبايل ولا الكمبيوتر ولا ‏الكاميرا الديجيتال ولقيتنا ‏رجعنا لعصر الحمام الزاجل والحصنه هتكون سعيد؟
هكون سعيد فى حالة واحدة بس لو لقيت نفسى فى عصر الصحابة أو التابعين
السعاده ‏هى؟
أن يقبضنى الله وهو راض عنى
عندك أمل ‏؟؟ أسبابك
عندى أمل رغم كثرة المحبطات لكن بكرة أحسن بإذن الله
امتى ‏أول مره خدت فيها نفس طويل كده وقلت بينك وبين نفسك يااااه الظاهر انا فعلا ‏كبرت؟
لما بامسك صور الذكريات اللى بتجمعنى أنا وأصدقائى
لما ‏بتعمل عمل خيرى بيكون ايه هو دافعك الاول؟
بكل صدق بيكون رضا الله عز وجل ثم إسعاد الأخرين
بتشرب ‏سجاير؟ لو الاجابه اه ايه شعورك لو شفت ست بتشرب سجاير؟ وليه ‏؟
ولله الحمد لابشربها ولا بطيقها لكن لما بشوف ست بتشرب سجاير بيبقى شعور بالإستفزاز وممكن أهزئها ولو تصادفت واتكلمت معايا وهى ماسكاها
بتعرف ‏ايدك اليمين من الشمال ازاي؟
عن طريق الوضوء والصلاة والأكل
ايه اكتر ‏اله موسيقيه بتحبها ؟ ؟
الموسيقى محرمة شرعا
فى رأيك ليه الذوق والنخوه ‏اتعدموا؟
البعد عن كتاب الله وسنته
ايه ‏الحاجه اللى لو حصلتلك تبقى سعيد قوى؟؟؟
إسعاد زوجتى وجعلها أسعد زوجة فى الدنيا ويمكن ده خلاف لبعض الرجالة شوية وهو إن طلبهم إن الزوجة تسعده أما أنا باتمنى إنى أكون
سبب فى سعادة زوجتى تنفيذا لوصية الرسول صلى الله عليه وسلم ؟( استوصوا بالنساء خيرا)0
تختار ‏يبقى عندك...أرض زراعيه ولا أجنس عربيات و لا كام عماره و لا فلوس فى ‏البنك؟؟؟؟
إن كانت الحاجات دى هتبعدنى عن ربنا يبقى تغور فى ستين داهية وإن كانت هتقربنى أ:تر من ربنا وتكون سبب لرضا ربنا يبقى أهلا بيهم كلهم
البحر و ‏لا النيل؟؟؟
البحر
مركب و ‏لا طياره؟؟
مركب
مجنون و لا ‏عاقل؟؟
يعنى رأى الناس فيا بكل أمانة وصدق إنى عاقل والحمدلله على نعمة العقل
تقرأ ‏كتاب و لا تتفرج عليه فيلم؟
لأ طبعا أقرأ كتاب وبالمناسبة أنا من عشاق قراءة الكتب
أمررة لمين ؟
لكل من قرأه

Saturday, October 20, 2007

خايف من إيه؟

صحيح بجد خايف من ايه؟
معاك كتاب الله وبكاء فى الليل يبقى خايف ليه؟
كل الدنيا ضدك وملك الملوك معاك يبقى خايف ليه؟
كل الهموم كترت ورب البشر موجود يبقى مخنوق ليه؟
فوق ياصاحبى وبص لفوق وسيبك من الدنيا وهمومها وارضى بما قسمه الله لك
يعنى هيحصل ايه للواحد يعنى ما هو كل يوم بيجى وبيمشى مرة حلو ومرة مر واهو كله
ماشى بأمر الله يبقى أحزن ليه؟
متاخدش فى بالك تحلالك عيشتك وتروق
أرزاق الخلق على الخالق مش على المخلوق
والدنيا دواير دايرة بينا من تحت لفوق
سيب بكرة لبكرة وخلينا على قد الشوق
والصاحب إن كانلك صاحب تلاقيه وياك
فى الشدة يقولك يامراحب وعنيه تلقاك
وفى البحر الدنيا الموج عالى والصاحب طوق
سيب بكرة لبكرة وخلينا على قد الشوق